Programación XL MITCFC

A EDICIÓN DOS 40 ANOS.

Chegamos aos 40 superando todo tipo de crises, con xiria, traballo, talento creativo, e un grande sentido do humor pero, sobre todo, grazas aos equipos artísticos, técnicos, sector teatral e público que nos acompañaron durante estas catro décadas, pezas do engraxado motor que nos trouxo ata aquí. 

Pode que as persoas da Asociación Cultural ´Xiria` que organizaron aquela primeira edición, non imaxinasen que aquela laboriosa iniciativa, aquel ousado e festivo impulso chegase tan lonxe pero a ambición non lles faltou. No programa da primeira edición dicían: Tentaremos facer destes días unha manifestación de festa colectiva, festa á que quixeramos darlle unha longa continuidade para contribuír así ao futuro deste xénero do noso teatro. Daquela, cunha democracia no berce, saíndo dun ostracismo político, social e cultural salvaxe, a MITCFC foi unha ventada de aire fresco que transformou de xeito radical a vida cultural e social de Cangas e do Morrazo.

Os anteriores equipos que organizaron e dirixiron a Mostra legáronlle á actual dirección e organización unha bagaxe que nos invita a mellorar, innovar e ampliar este fabuloso proxecto que é a MITCFC:

• Motor da creación escénica galega máis contemporánea.
• Primeiro festival estatal e europeo en aplicar a perspectiva de xénero á súa programación e organización.
• Pioneira en establecer, hai máis de 25 anos, os primeiros lazos profesionais entre Galicia e Portugal, co mítico TEATRAGAL.
• Promotora infatigable da pedagoxía escénica e dos encontros profesionais.
• Berce profesional de grandes artistas da nosa escena e audiovisual.
• 23 anos do pioneiro proxecto Mulleres en Acción.
• 7 anos do único Torneo de Dramaturxia de Galicia.
• Escaparate do traballo cultural das asociacións e escolas de Cangas.

Os premios recibidos na última década e que tanto agradecemos, avalan á MITCFC:

• 2021. PREMIO DE HONRA MARISA SOTO Á TRAXECTORIA, da AAAG.
• 2020. PREMIO FEGATEA Á ANIMACIÓN TEATRAL.
• 2018. PREMIO DA CRÍTICA DE GALICIA.
• 2015. PREMIO DÍA INTERNACIONAL DAS MULLERES do Ilmo. Concello de Cangas.
• 1997. Premio Xohan de Cangas ao Labor Cultural do Ilmo. Concello de Cangas.

Queremos crer que esta Mostra é motivo de orgullo para Cangas e para toda Galicia, porque fai viaxar o nome desta vila e desta terra alen das nosas fronteiras.

A Mostra de Cangas é máis que un festival, é un xeito de vivir, de crear e relacionarse. Benvidas e Benvidos. A 40 edición vai comezar.