Non nos xorden as palabras, non temos voz, afónicas de dor, de impotencia, de ausencia... O teatro do Morrazo, de Cangas, o teatro galego, esta Mostra ten crebado o sorriso, triste aceno debuxado no rostro, como no lenzo de Munch lanzamos un berro seco, xordo, mudo, un berro que implosiona en cada un dos nosos corazóns.
Recibimos a peor nova posible para rematar este triste 2020. A escena, a literatura, as ondas da radio, a cultura galega, en definitiva, este país, ven de perder unha das súas voces máis afinadas, a de Lino Braxe (Mugardos, 1962- A Coruña, 2020).
Director, actor, locutor, autor, activista cultural e, sobre todo, poeta.
Poeta, como el quixera ser recordado e como, sen dúbida, acontecerá. A súa obra poética é a mellor testemuña de que o seu desexo respondía a unha realidade creativa indiscutible.
Así o lembrará esta Mostra que, tamén, foi a súa casa, como un poeta, aquel que escribíu estes emocionados versos:
A Federación Galega de Teatro Afeccionado (Fegatea) outorgounos este ano o seu Premio á Animación Teatral 2020, nun entrañable acto que se celebrou en Ribadavia. Estas foron as fermosas palabras que, a presidenta de Fegatea, Chelo Pampillón, nos adicaron na entrega. Grazas polo recoñecemento e pola acollida.
'The primitals' fíxose co Premio do Público da 37 edición da Mostra Internacional de Teatro Cómico e Festivo de Cangas. O espectáculo, da compañía madrileña Yllana & Primital Brothers, foi estrenado en Galicia o venres 17 de xullo e levantou unha incrible ovación dun público posto en pé ao final da obra. Adri Soto é un dos catro protagonistas deste espectáculo de música a capela, xunto con Íñigo García Sánchez, Pedro Herrero e Manu Pilas. Con el falamos do seu paso pola Mostra, de Galicia e da cultura na era post Covid-19.
O espectáculo 'The primitals', da compañía madrileña Yllana & Primital Brothers, gañou o Premio do Público desta XXXVII Mostra Internacional de Teatro Cómico e Festivo de Cangas (MITCFC). Este ano, de maneira excepcional e por razóns de seguridade pola pandemia da Covid-19, a votación non se fixo directamente en urna despois de cada obra, senón que elixiouse un comité integrado por representantes do Concello de Cangas, de asociación cultural Xiria, do equipo organizador da Mostra e do público.
