A Mostra

UN PROXECTO ARTÍSTICO, CULTURAL E SOCIAL

Fundada en 1984 pola asociación cultural Xiria, a Mostra Internacional de Teatro Cómico e Festivo de Cangas (MITCFC) é hoxe unha das máis relevantes manifestacións galegas, estatais e internacionais de espectáculos contemporáneos que teñen o humor por bandeira.

Cada ano, a MITCFC inaugura o verán e transforma o patrimonio arquitectónico e xerográfico de Cangas nunha fabulosa vila-teatro na que se exhiben os máis novidosos espectáculos en espazos únicos, máxicos e inospeitados: capelas, santuarios, adros, mercados, escaparates, vestíbulos, castros, lagoas, prazas, xardíns, praias e mesmo o propio mar, atraendo a milleiros de persoas de todas as idades e procedencias xeográficas e acadando unha sorte de alianza entre o público máis popular e o teatro máis diverso e contemporáneo.

A MITCFC, referente autonómico e estatal en materia de igualdade de xénero, é a primeira mostra estatal en aplicar a paridade á súa programación, mesmo antes do nacemento das actuais leis de igualdade. Unha programación paritaria que, xunto ao orixinal proxecto Mulleres en Acción difunde, desde o ano 2000, o pensamento, debate e a creación escénica das mulleres de todas as xeracións.

A MITCFC é algo máis que un festival, é un espazo aberto á cultura e á creación, con cursos, exposicións, proxeccións, performances, encontros profesionais e debates, un particular foro no que artistas e público, galego, internacional e estatal, comparten teatro, ideas e experiencias.

Unha Mostra na que todo o mundo pode acceder á cultura.