• Inicio
  • A Mostra
  • Actualidade
  • Xosé Manuel Pazos, Premio de Honra da Academia Galega do Teatro

Xosé Manuel Pazos, Premio de Honra da Academia Galega do Teatro

Academia Galega de Teatro (AGT) outorga o seu Premio de Honra a Xosé Manuel Pazos Varela polo seu “compromiso e traballo para crear un futuro para o teatro do noso país”. A presidenta da Academia, Imma António Souto, explica que o que fora alcalde de Cangas é merecedor deste galardón porque o feito de que “Cangas teña un Auditorio e exista esta Mostra de Teatro cun público asentado ten que ver co seu traballo ao longo de moitos anos”. A Academia Galega de Teatro destaca “o xeito que sempre tivo Xosé Manuel Pazos de levar a vida política sempre da man da vida cultural”. 

Este galardón foi entregado ao longo da inauguración da exposición documental e da homenaxe a Xosé Manuel Pazos organizada pola Mostra Internacional de Teatro Cómico e Festivo de Cangas e que marca o inicio desta 38 edición.   

Pazos era, fundamentalmente, un home do teatro, desenvolvendo traballos como actor, director, autor e tradutor teatral. Nos anos 70, froito do asociacionismo e da súa intensa actividade cultural e política, promove iniciativas como o grupo de Teatro Matamoura de Coiro que derivou no Colectivo de Teatro Múa e posteriormente na Escola Dramática Galega (Sección Vigo), para en 1986 poñer o colofón coa creación de Teatro de Ningures. Con Teatro de Ningures participa nos seus inicios como actor, para logo dedicarse a labores de produción e, finalmente, ás de tradución, adaptación e escrita de textos teatrais, estando vencellado practicamente a todos os espectáculos desta compañía. En 2008 recibiu o Premio Max das Artes Escénicas ao Mellor Autor Teatral en Galego xunto a Cándido Pazó, Suso de Toro, Anxos Sumai e Sonia Delgado por ‘Emigrados’.

A presidenta da AGT destaca o “xeito conciliador” do que fixo gala sempre o ‘Alcalde do Teatro’, entendendo “a cultura como un dereito” para a cidadanía. Imma António sinala que Pazos Varela é gran merecedor deste premio. “A mágoa é que chegamos tarde para darllo en vida porque a vocación destes galardóns é entregalos en vida”.

A Academia Galega de Teatro fundouse o 21 de outubro de 2017 cun primeiro obxectivo: Fomentar o desenvolvemento das artes e as ciencias relacionadas directa ou indirectamente co teatro, a arte dramática e a produción teatral en todos os seus subsectores, xéneros e formatos. Ata este ano, recibiron o Premio de Honra, Manolo Lourenzo, Luís Álvarez Pousa, María Xosé Queizán, Ernesto Chao, Celso Parada e Gustavo Pernas.

Xosé Manuel Pazos foi case nos últimos anos un dos académicos da AGT. “É absolutamente de recibo que a Academia destaque o seu importante traballo e contribúa a visibilizalo socialmente”, afirma Imma António. “Pazos ten méritos suficientes para ser un home que a sociedada galego considere un patrimonio de seu”, destaca.

Contacta coa MITCFC

Auditorio Municipal de Cangas
Avenida de Lugo, 36940 Cangas, Pontevedra

Tel.: +34 986 30 41 08
Descargar información como: vCard

Este enderezo de correo está a ser protexido dos robots de correo lixo. Precisa activar o JavaScript para velo.
© MITCFC. Todos os dereitos reservados.
Deseño: Diego Seixo.