-
Dramaturga, MITCFC
-
Galicia
-
Esther Carrodeguas
-
Iván Caloto, Marta Lado, Amantia Coello, David Gun Gundas
-
Adulto
O Torneo de Dramaturxia de Galicia consolídase como unha aposta firme da MITCFC para dar a coñecer a nosa dramaturxia, creando un nexo directo entre autoras/es e público.
Este proxecto, pioneiro en Galicia, conta coa imprescindible colaboración de DramaturGA, a primeira asociación profesional da dramaturxia galega.
Os torneos de dramaturxia son unha idea orixinal de Jordi Casanovas desenvolvida conxuntamente co Festival Internacional Temporada Alta de Girona.
Unha mestra de cerimonias única presentará este furioso combate no que catro recoñecidas dramaturGAS e dramaturGOS de Galicia bátense na procura do voto do público. As armas a usar? Retruques da palabra, ideas, ritmos, conflitos, sorpresas, accións, silencios.
O público asistirá a catro lecturas dramatizadas, interpretadas por actrices e actores profesionais de recoñecido prestixio, e será o propio público quen vote os textos que máis lles teñan gustado para que, de entre as catro pezas participantes, resulte unha soa a gañadora. Un espectáculo teatral, divertido e único que se verá avivado pola participación activa do público.
Mestra de Cerimonias: Esther Carrodeguas.
COMBATENTES TORNEO 2025
Iván Caloto: Actor, director, dramaturgo e profesor de teatro. Graduado en Arte Dramática pola ESAD de Galicia, na especialidade de Dirección de Escena. O seu eido profesional abrangue dende a docencia con menores e adultos ata o campo terapéutico. Crea os obradoiros de Teatro Emocional en 2013. Colabora con impresións e crónicas sobre espectáculos na Erregueté, ADE Teatro, O Galiñeiro, Praza Pública ou a TVG, no programa "Zig Zag Diario".
Marta Lado: Nacida no Pindo e criada en Fisterra. Nai desde 2019.
Actriz titulada pola ESAD de Galicia con experiencia en cine, teatro e televisión. Licenciada en Económicas pola Universidade de Vigo.
Escritora de textos teatrais, contos de literatura infantil, monólogos e sketchs cómicos para teatro e televisión. Profe de teatro. Colaboradora da revista Eló!
Amantia Coello: Ourense, 1988. É psicóloga social e investigadora no eido educativo e cultural. Dende 2016 traballa de directora de teatro comunitario, destacando Teatro Airiños, e xuvenil, xénero no que publicou unha escolma de pezas en 2024. Entre outros, ganou o Xuventude Crea 2015 e 2024. Actualmente estuda na ESADG Dirección Escénica e Dramaturxia.
David Gun Gundas: Máis coñecido como Lope de Vigo ou o Fénix dos inxenuos, pola súa capacidade de renacer sempre na súa propia estupidez. É un ex novo actor e dramaturgo de Knight City, mundialmente famoso por non publicar nunca nada do que escribe.
